असार २०, काठमाडौं । नेकपा एमालेभित्रको बिवाद समाधानको प्रयासस्वरुप आज ध्यक्ष केपी शर्मा ओली निकट नेताहरु र वरिष्ठ नेता माधव नेपालबीच छलफल भएको छ ।
दुई नेता आ–आफ्नो अडानमा रहँदा पार्टी फुटतर्फ उन्मुख भएपछि दोस्रो तहका नेताहरु एकताका लागि सक्रिय भएका हुन् । आइतबार विहान ओली पक्षका नेताहरु सुवास नेम्बाङ, विष्णु पौडेल र शंकर पोखरेल नेता नेपालको निवास कोटेश्वर पुगेका थिए । उक्त भेटमा नेपाल पक्षका नेता घनश्याम भुसाल पनि उपस्थित भए ।
उक्त छलफलमा नेताहरुले नेपाललाई अध्यक्ष ओलीसँग भेटेर कुरा गर्न आग्रह गरेका छन् ।
माधवकुमार नेपाल समूहका नेता घनश्याम भुसालले शनिबार पनि अध्यक्ष ओली र नेता नेपालबीच टेलिफोनमा कुराकानी गराएका थिए । तर कुनै सहमति भने भएको छैन ।
एमालेले विपक्षी दलका नेतालाई प्रधानमन्त्री नियुक्त गर्न सर्वोच्च अदालतमा बुझाएको हस्ताक्षर फिर्ता गर्न वरिष्ठ नेता माधवकुमार नेपाल समूहलाई सोमबारसम्मको अल्टिमेटम दिएको छ। वरिष्ठ नेता नेपालले भने हस्ताक्षर फिर्ता नलिने अडान ओलीसमक्ष राखेका छन्।
