असार १२, काठमाडौँ । नेपाली कांग्रेसका सभापति शेरबहादुर देउवाले राष्ट्रपति विद्यादेवी भण्डारी केपी ओलीका कार्यकर्ताजस्तो बनेको आरोप लगाएका छन् ।
संसद् भवन नयाँ बानेश्वरमा आयोजित पत्रकारहरुसँगको अन्तरक्रियामा सभापति देउवाले आफूलाई १४९ सांसदले प्रधानमन्त्रीमा समर्थन गर्दै हस्ताक्षर गरे पनि राष्ट्रपतिले रातारात संसद विघटन गरेको भन्दै आपत्ति जनाए । देउवाले भने, राष्ट्रपतिले प्रधानमन्त्रीको कार्यकर्ता जस्तै भएर काम गर्नुभयो । सबैभन्दा दुःख त मलाई राष्ट्रपतिसँग लागेको छ ।’
प्रधानमन्त्रीको दाबी गर्दै आफूले १४९ जना सांसदको हस्ताक्षर बुझाए पनि हस्ताक्षर सनाखत नगरेर राष्ट्रपतिले गल्ती गरेको भन्दै देउवाले संविधानको व्याख्या गर्ने अन्तिम ठाउँ अदालत भएकोले आफूहरूको पक्षमा फैसला गर्ने विश्वास व्यक्त गरे ।
सभापति देउवाले ओलीलाई अधिनायकवादीको संज्ञापनि दिएका छन्। संविधानवादी लोकतन्त्रवादी नभएर ओली मनपरी गर्ने अधिनायकवादी भएको देउवाले आरोप लगाएका हुन् । संविधानमा लेखेको राष्ट्रपतिले नमानेपछि अदालत गएको हो। संविधानको अन्तिम ब्याख्या सर्वोच्चले गर्ने हो।’ उनले भने ।
