२८ जेष्ठ, बैतडी । बैतडीमा जेष्ठ नागरिकलाई खोप लगाउने अभियान आजदेखि सुरु हुदैंछ । देशभर जेठ २५ गतेदेखि उक्त अभियान सञ्चालनमा आएको भएपनि बैतडीमा भने आजदेखि मात्रै सञ्चालनमा आउन लागेको हो ।
सरकारले जेठ २५ गतदेखि ६२ देखि ६४ बर्ष उमेर समूहका नागरिकलाई कोरोना विरुद्धको भेरोसेल खोप लगाउन भनेपनि बैतडीमा भने आजदेखि खोप अभियान सुरु हुने भएको हो ।
सुरुमा ६० देखि ६४ बर्षका नागरिकलाई खोप दिने भनिएकोमा पछि संशोधन भएर ६२ देखि ६४ बर्षका नागरिकलाई खोप दिने भनेकाले खोप अभियान सुरु गर्न केही ढिलाई भएको स्वास्थ्य कार्यालयका प्रमुख योगेशप्रसाद भट्टले जानकारी दिनुभयो ।
उहाँले भन्नुभयो,“पहिला ६० देखि ६४ भनेकोमा अहिले ६२ देखि ६४ भनेकाले सबैठाउँमा सूचना प्रवाह गर्नका लागि केही ढिला सुरु गर्ने गरेका हौं” ।
स्वास्थ्य कार्यालयका अनुसार जिल्लाको दशरथचन्द नगरपालिका, दोगडाकेदार गाउँपालिका र डिलाशैनी गाउँपालिकामा जेठ २८ गते आज खोप लगाइनेछ भने मेलौली नगरपालिका, शिवनाथ गाउँपालिका र पञ्चेश्वर गाउँपालिकामा जेठ ३० गते खोप लगाइनेछ ।
यस्तै पाटन नगरपालिका, पुर्चौंडी नगरपालिका, सिगास गाउँपालिका र सुर्नया गाउँपालिकामा असार १ गते खोप लगाइने जनाइएको छ ।
