सुदुरपश्चिम प्रदेश सरकारका मुख्यमन्त्री त्रिलोचन भट्टले राखेको विस्वासको मत लिने प्रस्तावको पक्ष विपक्षमा मतदानको प्रकृया शुरु भएको छ । नेकपा विभाजनसँगै एमाले ओली समुहले माओवादी नेतृत्वको सरकार विस्थापित गर्न कदम चालेका थिए ।
तर एमाले भित्रको माधव समुह, काँग्रेसको समेत समर्थनमा माओवादीको सरकार थप मजबुत हुने देखिएको छ । एमाले भित्र ओली समुहको तुलनामा बलियो हैसियतमा रहेको माधव समुहको संसदीय दलको बैठकले मुख्यमन्त्री भट्टलाई विस्वासको मत दिने निर्णय गरीसकेको छ ।
त्यसै गरी काँग्रेसले पनि आवस्यक परे विस्वासको मत दिने निर्णय आजै गरेको छ । यसले माओवादीलाई राहत मिलेको छ ।
यस अघि कर्णालीमा पनि ओली समुहको निर्देशन विपरीत फ्लोर क्रस गरेर माधव समुहका चार सांसदले मत दिएपछि माओवादीका महेन्द्र बहादुर शाहीको सरकार सुरक्षित भएको थियो ।
सुदूरपश्चिम प्रदेश सभामा ५२ सदस्य छन्। यहाँ मुख्यमन्त्री भट्टलाई विश्वासको मत प्राप्त गर्न २७ मत चाहिन्छ।
नेकपा एमालेका २४ जना सदस्य छन्। नेकपा माओवादीका १३ जना छन्। नेपाली कांग्रेसका १२ जना र जनता समाजवादी पार्टी जसपा नेपालका दुई जना प्रदेश सभा सदस्य छन्।
एमालेका २४ मध्ये १६ सदस्य माधव नेपाल पक्षमा छन्। प्रधानमन्त्री ओली पक्षमा ८ जना मात्रै रहेको बताइएको छ।
