जेठ १४ पोखरा । अक्सिजनका लागि यति ठूलो सहयोग र लगानी भईरहे पनि त्यसैको अभावमा पोखरा स्वास्थ्य विज्ञान प्रतिष्ठानअन्तर्गतको पश्चिमाञ्चल क्षेत्रीय अस्पतालमा एक सुत्केरी सहित ८ जनाको ज्यान गएको छ ।
अस्पतालका कोभिड फोकल पर्सन डा. शरद बरालले अनुसार भर्ना भएका कोरोना संक्रमितकोे मृत्यु भएको जानकारी दिए ।
हाईफ्लोमा अक्सिजन दिनु पर्ने अवस्थाका विरामी रहेको र उद्योगबाट अक्सिजन आउन आधा घण्टा ढिला हुँदा ती बिरामीको ज्यान गएको हो । उनीहरुलाई प्रति मिनट ६० देखि ८० लिटर अक्सिजन चाहिने थियो तर त्यो उपलव्ध नहुँदा ज्यान गएको हो ।
मृत्यु हुनेहरुमा तनहुँका ३, कास्कीका २, पर्वत, म्याग्दी र स्याङ्जाका १–१ जना रहेका छन् । मृत्यु हुनेमा एक जना डायलसिस गराइरहेका मिर्गौला रोगी, कलेजोसम्बन्धी रोग भएका एक जना र मधुमेहका एक जना रोगी थिए ।
यस अघि पनि अक्सिजन अभावमा विभिन्न अस्पतालमा संक्रमितको मृत्यु भएको थियो ।
सरकारले नागरिकको ज्यान बचाउन लागिपरेको भने पनि अझै पनि अक्सिजन पर्याप्त उपलव्ध गराउन नसकेको देखिएको छ ।
