इलाम, १६ कात्तिक । चिकित्सा शिक्षा र स्वास्थ्य क्षेत्र सुधारको माग राख्दै इलाममा २५औँ पटक सत्याग्रहमा बसेका प्रा. डा. गोविन्द केसीको स्वास्थ्य अवस्था गम्भीर बनेपछि उपचारका लागि काठमाडौँ ल्याउने तयारी गरिएको छ।
इलाम अस्पतालका अनुसार उनको उपचारका लागि सेनाको हेलिकप्टर इलाम आउँदै छ।
टाइप-२ मधुमेहबाट पीडित डा. केसीको रगतमा चिनीको मात्रा (ग्लुकोज) खतरनाक स्तरसम्म घटेपछि शनिबार राति करिब ८ बजे इलाम अस्पताल भर्ना गरिएको थियो। अस्पतालका अनुसार उनको रगतमा ग्लुकोजको मात्रा घट्दै ३६ मिलिग्राम प्रतिडेसिलिटरसम्म पुगेको छ, जसलाई चिकित्सकीय भाषामा गम्भीर हाइपोग्लाइसेमिया भनिन्छ। यस्तै पिसाबमा एसिटोनको मात्रा पनि बढेको पाइएको छ।
चिकित्सकहरूका अनुसार उनको ईसीजी परीक्षणमा कहिलेकाहीँ भेन्ट्रिकुलर प्रिम्याच्योर कम्प्लेक्स (भीपीसी) समेत देखिएको छ। डा. केसीको रक्तचाप १००/६० एमएमएचजी, नाडीको गति प्रतिमिनेट ८० देखि १०८ र रगतमा अक्सिजनको मात्रा ९२ देखि ९६ प्रतिशत रहेको छ।
स्वास्थ्य अवस्था थप बिग्रिएर जीवन नै जोखिममा पर्न सक्ने भन्दै इलाम अस्पतालले थप उपचार र व्यवस्थापनका लागि कोशी प्रदेशको स्वास्थ्य मन्त्रालयलाई आग्रह गरेको थियो।
