जेठ १४ काठमाण्डौं । प्रतिनिधि सभा विघटन बिरुद्ध परेका सबै रिटहरुमाथि आजबाट संवैधानिक ईजलाशमा सुनुवाई शुरु हुँदै छ । बिहिबार १९ वटा रिटको प्रारम्भिक सुनुवाई गर्दै प्रधानन्यायधीश चोलेन्द्र शमशेर जबराले सबै रिटलाई संवैधानिक ईजलाशमा पठाउने निर्णय गरेका थिए ।
आज प्रतिनिधि सभा विघटन गर्ने सरकारको निर्णय खारेज गर्नु पर्ने, बहुमत सांसदले शसरीर उपस्थित भएर दिएको लिखित निवेदनका आधारमा काँग्रेस सभापति शेर बहादुर देउवालाई प्रधानमन्त्री बनाउन परमादेश जारी गर्नु पर्ने लगायतका माग विपक्षी गठबन्धनले गरेको छ ।
त्यस्तै २८ मध्य चार वटा रिट भने प्रधानमन्त्री केपी शर्मा ओलीलाई पुनः नियुक्ति गर्नु पर्ने बिषयमा केन्द्रीत रहेका छन् ।
जेठ ७ गते प्रधानमन्त्रीका लागि काँग्रेस सभापति शेर बहादुर देउवाको पक्षमा १४९ हस्ताक्षर सहित सांसदहरु गए पनि राष्ट्रपतिले दाबी नपुग्ने भन्दै पुनः संसद विघटन र मध्वावधि निर्वाचनको घोषणा गरेपछि विपक्षी अदालतको ढोकामा पुगेका छन् ।
