काठमाडौं, जेठ ११ । संसद विघटन खारेज गर्नु पर्ने र शेरबहादुर देउवालाई प्रधानमन्त्री बनाउन माग गर्दै सर्वोच्च अदालतमा १४६ सांसदले हालेको रिटमा आज सर्वोच्चले पेशी तोकेन ।
देउवा, पुष्पकमल दाहाल, माधव, नेपाल, उपेन्द्र यादवसहित विघटित प्रतिनिधिसभाका १४६ सदस्यले परमादेश लगायतका आदेश माग्दै दायर गरेको रिट मंगलबार पेशीमै नचढेको हो ।
सर्वोच्च अदालतले सार्वजनिक गरेको दैनिक पेशी सूचीमा मंगलबारका लागि दुई वटा मात्र इजलाश तोकिएका छन् ।
दुबै इजलाशमा प्रतिनिधिसभा विघटन अवैधानिक भएको र संविधानको धारा ७६(५) बमोजिम प्रधानमन्त्री नियुक्तिसँग सम्बन्धित दायर २८ वटा रिटको पेशी उल्लेख छैन ।
दुई इजलाशमा न्यायाधीश दीपक कार्की र सपना प्रधान मल्लको इजलाशमा बन्दी प्रत्यक्षीकरण लगायतका चार तथा न्यायाधीश आनन्दमोहन भट्टराईको इजलाशमा एउटा मुद्दा छ ।
सोमबार नेपाली कांग्रेस, माओवादी केन्द्र, एमालेका नेपाल तथा जसपाको यादव पक्षका १४६ सांसदले प्रधानमन्त्रीले गरेको प्रतिनिधि सभा विघटनलाई असंवैधानिक भन्दै धारा ७६ को उपधारा ५ बमोजिम नयाँ प्रधानमन्त्रीमा देउवालाई नियुक्त गर्न माग गर्दै रिट निवेदन पेश गरेका थिए ।
ती मुद्धाहरु संवैधानिक ईजलाश खडा गरेर शुक्रबार देखि बहस हुन सक्ने बताईएको छ ।
