जेष्ठ २, काठमाडौँ । प्रधानमन्त्री केपी शर्मा ओलीले नेपालीको इम्युन सिस्टम स्ट्रोङ भएकाले अहिलेको जसरी कोरोना भाइरसको संक्रमण फैलिएला भन्ने आफूलाई नलागेको बताएका छन् । कोभिड–१९ संकट व्यवस्थापन केन्द्र (सीसीएमसी) को आजको बैठकलाई सम्बोधन गर्दैं ओलीले नेपालीको रोग प्रतिरोधात्मक क्षमता धेरै बलियो रहेकाले यो संक्रमण फैलिँदैन भन्ने आफूलाई लागेको बताएका हुन् ।
नेपालमा कोभिड बढेपनि इम्युन सिस्टम (रोग प्रतिरोधात्मक प्रणाली) धेरै स्ट्रोङ रहेकाले अलिअलि सर्ला तर यस तहमा चाहिँ वृद्धि हुन सक्दैन भन्ने लागेको ओलीको भनाई थियो ।
कोरोनाको दोस्रो लहर चलिरहेको नेपालमा दैनिक करिब ९ हजार व्यक्तिमा संक्रमण देखा परिरहेको अवस्थामा प्रधानमन्त्री ओलीले कोरोनाले नेपालमा यस तहको प्रभाव पार्ने आफूले नठानेको बताएका हुन् ।
कोरोना संक्रमणबाट मुक्त हुनुमा रोग प्रतिरोधात्मक प्रणाली बलियो हुनु नै रहेको ओलीले दोहोर्याएका छन् ।
कोरोना संक्रमण नियन्त्रणमा विभिन्न सरकारी निकायबीच समन्वयको अभाव देखिएको स्वीकार गर्दै प्रधानमन्त्री ओलीले आगामी दिनमा त्यसमा सुधार गरिने बताए ।
पछिल्लो समय कोरोना संक्रमितलाई अक्सिजन पुर्याउन समस्या रहेको ओलीले बताए । अक्सिजन पर्याप्त मात्रामा उत्पादन या आयात गर्नुपर्ने र सबै प्लान्टलाई म्याक्सिमम क्षमतामा सुचारु गर्नुपर्छ,ु ओलीले भने ।
नेपालमा रहेका अक्सिजन प्लान्टलाई पूर्ण क्षमतामा सञ्चालन गर्नुपर्ने र बाँकी आयात गर्नुपर्ने ओलीको भनाइ थियो ।
सीसीएमसीको नेतृत्व उपप्रधानमन्त्री ईश्वर पोखरेलले गर्दै आएकोमा आइतबार भने प्रधानमन्त्रीले त्यसको अध्यक्षता गरेका हुन् । सीसीएमसीको बैठकले कोरोना संक्रमितको उपचार तथा कोरोना संक्रमण रोकथामका लागि अत्यावश्यक सामग्रीको आपूर्तिमा तदारुकताका साथ लाग्न सम्बन्धित निकायलाई निर्देशन दिएको छ ।
