३० बैशाख, काठमाडौं । नेकपा एमालेका अध्यक्ष केपी शर्मा ओली र वरिष्ठ नेता माधवकुमार नेपालबीच भेटवार्ता सुरु भएको छ ।
काठमाडौं बूढानीलण्ठस्थित एक व्यवसायीको घरमा अध्यक्ष ओली र नेता नेपालबीच भेटवार्ता भईरहेको प्रधानमन्त्रीका प्रेस सल्लाहकार सूर्य थापाले जानकारी दिनुभयो ।
अध्यक्ष ओलीले वालुवाटारमा भेटवार्ता गर्ने भनेपनि नेता नेपाल बालुवाटार जान नमानेपछि नेताद्वयबीच वार्ताको लागि छुट्टै स्थान तय गरिएको स्रोत बताउछ ।
नेपाल पक्षका चार नेतामाथिको कारबाही फिर्तापछि ओली र नेपालबीच वार्ता तय भएको हो । यसअघि वैशाख ८ र ९ मा दुई नेताबीच मेरियट होटलमा भएको भेटवार्ता निष्कर्षविहीन भएको थियो ।
आज बिहान एमालेको स्थायी कमिटीले नेपाल सहित नेपालको समूहका ४ जना नेताको कारबाही फिर्ता लिएको थियो । बैठकबाटै ओलीले नेपाललाई फोन गर्नुभएको थियो ।
राष्ट्रपतिले बहुमतको सरकार गठनका लागि दिएको समय सीमा आजै समाप्त हुँदैछ । त्यसअघि नै ओलीले नेपालसँग वार्ता गर्नुभएको हो । संसदमा ओलीले विश्वासको मत लिने प्रस्ताव गर्दा नेपाल समूहका २८ सांसद अनुपस्थित भएका थिए । नेपाल पक्षका सांसदले संसदबाट राजीनामा दिन परामर्श गरिरहेका बेला ओली नेपाल वार्ता भएको हो । आफ्ना माग सम्बोधन गर्न आजै अपरान्ह ४ बजेसम्मको समय सो समूहका नेताहरुले दिएका छन् ।
