बैशाख २९ पोखरा । गण्डकी प्रदेशको मुख्यमन्त्रीमा एमाले नेता पृथ्वीसुब्बा गुरुङलाई राजीनामा दिएको ७२ घण्टा भित्रै नियुक्त गरेपछि विपक्षी गठबन्धन आक्रोशित बनेको छ।
संविधानको धारा १६८ को उपधारा २ अनुसार बहुमतका आधारमा सरकार गठन गर्न सकिने अवस्था हुँदाहुँदै प्रदेश प्रमुखले उपधारा ३ अनुसार ठूलो दलको नेतालाई मुख्यमन्त्री नियुक्त गरेको भन्दै उनीहरु आक्रोसित बनेका हुन् ।
विपक्षी गठबन्धनबाट मुख्यमन्त्रीका दाबेदार एवम् कांग्रेस नेता कृष्णचन्द्र नेपालीले प्रदेश प्रमुख पौडेलले संविधान कुल्चिएर यो नियुक्ति भएको भन्दै बिरोध जनाए ।
भर्खरै नियुक्त प्रदेश प्रमुख सीता पौडेलले पार्टीको बफादार कार्यकर्ताको जस्तो भूमिका खेलेको उनको आरोप छ ।
गठबन्धनबाट विज्ञप्ति जारी गरेर प्रदेश प्रमुखको कदमको विरोध जनाउने तयारी गरेको उनले जनाए।
प्रदेश प्रमुख पौडेलले संविधानको धारा १६८ को उपधारा २ अनुसार बहुमतका आधारमा सरकार गठन गर्न चार दलको दाबी अघि बढाउनुपर्नेमा त्यसो नगरेको नेपालीले बताए।
यता, माओवादी केन्द्रका संसदीय दलका नेता हरिबहादुर चुमानले पनि प्रदेश प्रमुखले संविधान मिचेको आरोप लगाएका छन्।
गण्डकी प्रदेशमा मुख्यमन्त्रीका लागि नेपाली कांग्रेस, माओवादी केन्द्र, जनमोर्चा, जनता समाजवादी पार्टीले आ–आफ्नो पार्टीको निर्णयसहित कांग्रेस नेता नेपालीलाई मुख्यमन्त्री बनाउन निवेदन दिएका थिए।
प्रदेश प्रमुखको कार्यालयमा यी चार पार्टीका निर्णय र मुख्यमन्त्रीका दाबेदार नेपालीको निवेदन दर्ता छ। गण्डकीमा रहेका पाँच दलमध्ये एमालेको २७, कांग्रेसको १५, माओवादी केन्द्रको १२ (सभामुख सहित) जनमोर्चाको ३ र जनता समाजवादी पार्टीको २ मत छ।
