पोखरा बैशाख २६ । गण्डकी प्रदेशका मुख्यमन्त्री पृथ्वीसुब्बा गुरुङले आज राजीनामा दिएका छन् ।
गुरुङमाथि प्रदेशसभामा अविश्वास प्रस्ताव पेश भएपछि उनले राजीनामा दिएका हुन् । उक्त प्रस्तावमाथि सोमबार मतदान हुने कार्यसूची थियो । गत साता मात्रै गण्डकीको प्रदेश प्रमुखमा नेकपा एमालेले सीता पौडेललाई नियुक्त गरेको थियो ।
राजीनामासँगै दिएको वक्तव्यमा मुख्यमन्त्री गुरुङले आफूले काम गर्ने वातावरण नभए पछि राजीनामा दिएको उल्लेख गरेका छन् ।
यसैबीच गण्डकी प्रदेशका मुख्यमन्त्री पृथ्वी सुब्बा गुरुङले पदबाट दिएको राजीनामा स्वीकृत भएको छ । प्रदेश प्रमुख सीता कुमारी पौडेलले संविधानको धारा १६९ को उपधारा १ ९क० बमोजिम गुरुङले दिएको राजीनामा स्वीकृत गरेकी हुन् ।
प्रदेश प्रमुखको कार्यालयले आइतबार जारी गरेको विज्ञप्तिमा अर्को सरकार गठन नहुँदासम्म संविधानको धारा १६९ को उपधारा ३ बमोजिम मौजुदा मन्त्रिपरिषद्ले कार्य सञ्चालन गर्ने जिम्मेवारी गुरुङ नेतृत्वको सरकारलाई नै दिएकी छिन् ।
यस्तै उनले ३ दिनभित्र नयाँ सरकार गठन गर्न आह्वान पनि गरेकी छिन् ।
काँग्रेसले नयाँ सरकार बनाउने दाबी
मुख्यमन्त्रीको राजीनामा सँगै अब काँग्रेसका संसदीय दलका नेता कृष्ण चन्द्र नेपालीको नेतृत्वमा नयाँ सरकार बनाउन बिपक्षीहरुले कसरत शुरु गरेका छन् ।
काँग्रेस, माओवादी केन्द्र, जसपा र जनमोर्चाले नयाँ सरकार बनाउन पहल गर्ने काँग्रेसी नेताहरुको भनाई छ ।
