२६ बैशाख, काठमाडौं । प्रधानन्यायाधीश चोलेन्द्रशमशेर जबराले विधिको शासनको सुनिश्चिततामा आफु प्रतिवद्ध रहेको बताउनुभएको छ ।
कानून दिवस, २०७८ का अवसरमा शुभकामना सन्देश दिँदै उहाँले नेपालको संविधानले प्रत्याभूत गरेको स्वतन्त्र, निष्पक्ष र सक्षम न्यायपालिका तथा विधिको शासनको सुनिश्चितता गर्दै सहज पहुँचयुक्त न्याय प्रणालीको स्थापना र विकासमा आफ्नो प्रतिबद्धता व्यक्त गर्नुभएको छ ।
प्रधानन्यायधिस जबराले यस दिवसले न्याय, समानता र विधिको शासनको प्रत्याभूतिका लागि क्रियाशील रहन सबैमा थप हौसला र प्रेरणा प्रदान गर्ने विश्वास व्यक्त गर्नुभयो ।
यो दिवस कानून र न्याय क्षेत्रका लागि मात्र नभई सबै क्षेत्र र नागरिकको तहसम्म पनि त्यत्तिकै महत्वपूर्ण भएकाले यसलाई राष्ट्रिय पर्वकै रुपमा मनाउन प्रधानन्यायाधीश जबराले आग्रह गर्नुभएको छ ।
साथै अहिले कोरोना महामारीका कारण अदलतको सेवाप्रवाहमा पर्न गएको असुविधालाई परिस्थितीजन्य वाध्यताका रुपमा लिईदिन पनि आग्रह गर्नुभएको छ ।
विसं २००९ मा आजकै दिन प्रधान न्यायालय स्थापना भएको थियो ।
