२४ वैशाख, बुटवल । अहिले कोरोना संक्रमित तीव्र रुपमा बढिरहेका बेला अस्पतालमा बेड र अक्सिजनको यति हाहाकार हुने स्थिति आएको छ कि आज एक जनप्रतिनिधिले वेड नपाएर एम्बुलेन्समै ज्यान गुमाउन पुगेका छन् ।
बुटवल उपमहानगरपालिका ७ का ४४ वर्षीय वडा सदस्य नवीन थापामगरको अस्पतालमा बेड खोज्दाखोज्दै एम्बुलेन्समै मृत्यु भएको हो ।
थापालाई एम्बुलेन्समा राखेर अस्पताल चहार्दाचहार्दै बेड नपाएर एम्बुलेन्समै उनको मृत्यु भएको हो । थापालाई एक हप्ता अघि कोरोना संक्रमण पुष्टि भएको थियो । उनलाई क्रिसमन, भीम अस्पताल पुर्याईए पनि अस्पतालले बेड नभएको जनाउ दियो । त्यस पछि मेडिकल कलेज पुर्याउदा त्याहाँ पनि बेड नपाए पछि अन्ततः एम्बुलेन्समै थापा मगरको मृत्यु भएको हो ।
उपमहानगरपालिकाका प्रवक्ता रामप्रसाद रेग्मीले अस्पतालमा समयमै उपचार नपाएका कारण वडा सदस्यको मृत्यु भएको बताए ।
