बैशाख १० काठमाण्डौं । बढ्दो कोरोना संक्रमणसँगै सरकार आफैले २५ जना भन्दा बढी भेला हुन नपाउने नियमको उलंघन गर्दै नेकपा एमाले केन्द्रीय महाधिवेशन आयोजक समितिको बैठक जारी छ । वालुवाटारमा जारी बैठकमा आयोजक समितिका २६५ सदस्य सहभागी रहेका छन् ।
२ सय ६५ मध्ये पूर्वप्रधानमन्त्री तथा पार्टीका वरिष्ठ नेता माधवकुमार नेपाल, उपाध्यक्ष भीम रावल, उपमहासचिव घनश्याम भुसाल र स्थायी समिति सदस्य सुरेन्द्र पाण्डेलाई पार्टीबाट निलम्बन गरेको हुँदा हाल २ सय ६१ जना सदस्य कायम रहेको सो समितिको बैठक आयोजना गरिएको हो।
तर खनाल नेपाल समुहका सदस्यहरु भने बैठकमा सहभागी छैनन् ।
सरकारले स्वास्थ्य मापदण्डका लागि २५ जनाभन्दा बढि जन्ती, मलामीमा समेत सहभागी हुन नपाउने नियम जारी गरेको छ। सोहि नियमअनुसार अहिले स्कूल, कलेज, फिल्म हल बन्द गरिएको छ। तर यति नै बेला प्रधानमन्त्री निवासमा भने एउटै सभाहलमा सयौं व्यक्ति सहभागी रहेको बैठक प्रधानमन्त्रीकै अध्यक्षतामा बसेको छ ।
बैठकले कर्णालीमा फ्लोर क्रस गर्ने चार सांसदलाई कार्बाही गर्ने र माधव नेपाल सहितका नेताका बारेमा छलफल गर्ने संभावना रहेको बुझिएको छ ।
