काठमाडौं, ९ बैशाख । सरकारका पूर्व उपसचिव सुरज डोटेलले कब्जा गरेर संरचना बनाई भाडामा लगाएको एक रोपनी ८ आना भन्दा बढी जग्गामा आज डोजर चलाईएको छ । काठमाडौँ महानगरपालिका–११ बबरमहलस्थित धोबीखोला नदी उकासको एक रोपनी आठ आना एक पैसा तीन दाम सार्वजनिक जग्गामा आज डोजर चलेको हो । काठमाडौं क्षेत्र नम्बर १ (क ) प्रदेश सभा सदस्य दीपेन्द्र श्रेष्ठको नेतृत्वमा सरकारी जमिन व्यक्तिको कब्जाबाट फिर्ता ल्याउने अहिले अभियान नै चलेको छ । प्रदेश सभा सदस्य श्रेष्ठ र काठमाडौ महानगरपालिका वडा नम्बर ११ का जनप्रतिनिधिको समन्वयमा डोटेलले हडपेको उक्त जग्गामा भइरहेको अतिक्रमण हटाएर पार्क निर्माण गर्ने तय भएको छ ।
कित्ता नं. २७ र १८ को यो जग्गा सरकारका पूर्वउपसचिव सुरज डोटेलले श्रीमती रेखा डोटेलको नाममा टहरा बनाएर भाडामा लगाई अतिक्रमण गरेको पाइएपछि काठमाडौँ महानगरपालिका–११ कार्यालयले पटक पटक खाली गराउन पत्राचार गरेको थियो ।
