बैशाख ६ काठमाडौं । नेकपा एमालेको झलनाथ खनाल र माधव नेपाल समुह पार्टी विवाद निरुपण गरिदिन माग गर्दै निर्वाचन आयोग पुगेको छ । बेदुराम भुषाल र राजेन्द्र पाण्डेसहितको टोली आयोग पुगेर पार्टी विवाद निरुपण गर्न पत्र बुझाएको हो ।
सो पक्षले आयोगलाई बुझाएको पत्रमा गत फागुन २३ पछि एमाले अध्यक्ष केपी शर्मा ओली पक्षले एकपक्षीय ढंगले गरेका निर्णयहरु अभिलेखिकरण नगर्न माग गरिएको छ ।
‘पार्टीको विधानअनुसार नचलेर पार्टीमा हुदै नभएको व्यवस्था गरेर विवाद सिर्जना गर्ने काम भएको भन्दै महाधिवेशनबाट पारित विधान संशोधन गर्ने, निर्वाचित कमिटि भंग गर्ने अनि महाधिवेशन आयोजक कमिटि बनाउने निर्णयलाई मान्यता नदिन सो समुहले माग गरेको छ ।
सर्वोच्च अदालतले गत फागुन २३ गते गरेको फैसलापछि माओवादी र एमाले पुर्ववत अवस्थामा फर्किए पनि अध्यक्ष ओली पार्टी विधान विपरित अघि बढेको भन्दै सो समुह समानान्तर गतिविधि गर्दै अघि बढेको छ ।
