चैत्र २८, काठमाडौँ । कोरोना संक्रमणको दोस्रो लहर फैलिन सक्ने भएकाले सतर्कता अपनाउन कोभिड–१९ संकट व्यवस्थापन केन्द्र (सीसीएमसी)ले अपील गरेको छ ।
शनिबार बसेको सीसीएमसीको बैठकले पछिल्लो समय कोभिड संक्रमण ग्राफ बढेको र नयाँ भेरियन्टसमेत देखापरेकाले सतर्कता अपनाउन अपिल गरेको हो ।
बैठकपछि प्रधानमन्त्री तथा मन्त्रिपरिषद्का सचिव खगराज बरालले कोारेना संक्रमण फेरी फैलनसक्ने भएकाले सतर्कता अपनाउन राष्ट्रिय रुपमा अपील गर्ने निर्णय गरेको बताए ।
साथै जिल्ला कोभिड–१९ संकट व्यवस्थापन केन्द्र (डीसीसीएमसी)लाई अझ सक्रिय बनाउने निर्णय पनि गरेको उनले बताए ।
सीमा नाकाहरुमा सञ्चालनमा आएका हेल्थ डेस्कहरुलाई थप प्रभावकारी बनाउने, एन्टिजेन टेष्टलाई बढाउने, कोभिड संक्रमण भई लक्षण देखा परेका बिरामीलाई अस्पताल भर्ना गर्ने र लक्षण नदेखिएकालाई क्वारेन्टाइनमा राख्ने निर्णय पनि बैठकले गरेको छ । कुनै पनि क्षेत्रबाट स्वास्थ्य मापदण्ड पालना नभई अटेरी रुपमा सञ्चालनमा आएको पाइए कडा कदम चाल्नुपर्ने अवस्था आउन सक्ने पनि सचिव बरालले जानकारी दिएका छन् ।
