१७ चैत, काठमाडौँ । सरकार र थरुहट थारुवान संयुक्त संघर्ष समितिबीचको बिहिवार पुनः वार्ता हुने भएको छ ।
गृह मन्त्रालयमा मंगलबारको वार्ता सकारात्मक भएको र बिहीबार फेरि बस्ने गरी टुंगिएको थारुवान संयुक्त संघर्ष समितिका पदाधिकारीहरुले जनाएका छन् ।
संघर्ष समितिका मागपत्र बारे दुई दिन अध्ययन गर्ने र बिहीबार फेरि वार्तामा बस्ने गरी वार्ता टुंगिएको हो । यसअघि संघर्ष समितिले अघि सारेको १९ बुँदे मागमा केन्द्रित भएर सरकारी वार्ता टोलीसँग छलफल भएको थियो ।
थारु कल्याणकारिणी सभाका केन्द्रीय अध्यक्ष धनीराम चौधरीको नेतृत्वमा रहेको थरुहट थारुवान संयुक्त संघर्ष समितिले मंगलबार बिहान पूर्व सांसद रुक्मिणी चौधरीको संयोजकत्वमा पाँच सदस्यीय वार्ता टोली गठन गरेपछि सरकारसँग वार्ता भएको हो ।
वार्ता टोलीको सदस्यमा महामन्त्री प्रेमीलाल चौधरी, सांसद एवम् नेपाली काँग्रेसका नेता पद्मनारायण चौधरी, थाकस केन्द्रीय सदस्य प्रभातकुमार चौधरी र थारु विद्यार्थी समाजका केन्द्रीय अध्यक्ष चन्द्रप्रसाद चौधरी रहेका छन् ।
सरकारको पक्षबाट सोमबार नै गृहमन्त्री रामबहादुर थापाको संयोजकत्वमा प्रधानमन्त्रीका परराष्ट्र मामिला सल्लाहकार डा.राजन भट्टराई र एमाले केन्द्रीय सदस्य भगवती चौधरी सदस्य रहेको तीन सदस्यीय वार्ता टोली गठन गरिएको थियो ।
