१२ चैत, काठमाडौं । नेकपा एमालेको संसदीय दलको बैठक शुक्रवार बस्ने भएको छ । प्रधानमन्त्री तथा नेकपा एमालेका अध्यक्ष केपी ओलीले शुक्रबार अपरान्ह ३ बजेका लागि संसदीय दलको बैठक बोलाएका हुन् ।
बैठकमा पछिल्लो राजनीतिक घटनाक्रम र पार्टीको आन्तरिक छलफल हुने एमाले संसदीय दलका प्रमुख सचेतक विशाल भट्टराईले बताए । संसदलाई कसरी प्रभावकारी बनाउने र संसदीय दललाई कसरी एक ढिक्का बनाएर अगाडि बढ्नेलगायत विषयलाई एजेन्डाको रुपमा बैठकमा प्रस्तुत गरिने एमाले स्रोतले जनाएको छ ।
यसअघि बालुवाटारमा बसेको संसदीय दलको बैठकमा वरिष्ठ नेता माधवकुमार नेपाल समूह नगएपछि यस पटकको बैठकमा यो विषयलाई एमालेले एजेन्डा बनाएको हो । यता, नेपाल खनाल समूहले भोली केन्द्रिय समिति बैठक बोलाएको छ ।
प्रधानमन्त्री ओलीले फागुन २८ गते गरेका निर्णय फिर्ता नलिएसम्म उनले बोलाएका कुनै पनि बैठकमा नजाने अडानमा वरिष्ठ नेता नेपाल समूह रहेको छ । प्रधानमन्त्री ओलीसँग असन्तुष्ट भए पनि अघिल्लो संसदीय दलको बैठकमा उपाध्यक्ष वामदेव गौतम भने सहभागी थिए ।
