चैत्र १२, काठमाडौँ । नेकपा एमालेको खनाल–नेपाल समूहले शुक्रबार बिहान ११ बजे केन्द्रीय कमिटीको बैठक बोलाएको छ । पार्टीको पछिल्लो विवादका विषयमा छलफल गर्न कलंकीस्थित एक पार्टी प्यालेसमा बैठक बोलाइको एक नेताले जानकारी दिए ।
बालुवाटारको एमाले केन्द्रीय कमिटी बैठकको निर्णय अनुसार नेता माधवकुमार नेपालसहित उपाध्यक्ष भीम रावल, उपमहासचिव घनश्याम भुसाल र स्थायी कमिटी सदस्य सुरेन्द्र पाण्डेलाई महासचिव ईश्वर पोखरेलले तीन दिनभित्र जवाफ पेस गर्न भन्दै सोमबार नेताहरुलाई स्पष्टीकरण पत्र पठाएपछि सो समूहले आफु पक्षिय केन्द्रिय सदस्यलाई छलफलमा बोलाएको हो ।
ओली पक्षले तत्कालीन नेकपामा भएका गतिविधिसमेतलाई जोडेर स्पष्टिकरण मागेपछि खनाल–नेपालसमूहका स्थायी कमिटीका नेताहरु विहिबार पनि छलफलमा बसेका थिए । स्थायी कमिटीका एक सदस्यका अनुसार स्पष्टिकरण पत्रको जवाफ तयार हुँदैछ ।
सो समूहले केन्द्रीय सदस्य, स्थायी कमिटी सदस्यका समेत सुझाव समेटेर अध्यक्ष एवं प्रधानमन्त्री केपी शर्मा ओलीलाई नै स्पष्टीकरण माग्ने तयारी गरेका छन् ।
फागुन २८ मा ओलीपक्षले एकलौटी रुपमा केन्द्रीय कमिटी बैठक राखेर केन्द्रीय कमिटी विस्तार, दशौं महाधिवेशनको मिति तयलगायतका निर्णय गरेको थियो । खनाल–नेपालपक्ष उक्त निर्णय फिर्ता लिएर ०७५ जेठ २ कै अवस्थामा जानुपर्ने माग गरेको छ ।
ओली पक्षले निर्णय नसच्याए खनाल–नेपालपक्षले देशैभर समानान्तर संगठन बनाउने निर्णय गरिसकेको छ ।
