काठमाडौँ, ११ चैत । नेकपा माओवादी केन्द्रका अध्यक्ष पुष्पकमल दाहाल प्रचण्डले नेपालीको आत्मनिर्णयको अधिकारसहित राष्ट्रकै भाग्य, भविष्य फेरि जोखिममा परेको बताएका छन् ।
नेपाल राष्ट्रिय उद्योग व्यापार संगठनको राष्ट्रिय भेला तथा प्रशिक्षण कार्यक्रमलाई बुधबार सम्बोधन गर्दै अध्यक्ष प्रचण्डले भावि सन्ततिहरुको भविष्य अहिले फेरि जोखिममा, धरापमा पारिएको बताएका हुन् । नेपालीहरुको आत्मनिर्णयको अधिकार फेरि एकचोटी जोखिममा छ,’ प्रचण्डले भने ।
उनले शान्ति सम्झौतामा हस्ताक्षर, संविधानसभाबाट संघीय लोकतान्त्रिक गणतन्त्रको घोषणा, संविधानसभाबाट संविधान घोषणा नेपाली आफैंले गरेको निर्णयको परिणाम रहेको बताए । तर, अहिले आदेशपालक बनाउन खोजिएजस्तो महसुस आफूलाई भएको उनको भनाइ छ ।
प्रचण्डले राजनीतिक चेतनालाई दह्रो बनाउँदै एकताबद्ध नभए अझै खतरा हुनसक्ने बताए । संविधानलाई कागजको खोस्टो बनाएर च्यात्न खोजिएको भन्दै प्रचण्डले त्यो सार्वभौम नेपाली जनताको सार्वभौम अधिकारको अपहरण भएको बताए । प्रचण्डले भने, ‘अहिले सर्वोच्चले सच्चाएको छ तर अझै पनि खतराको कालो बादल मडारिइराखेको छ आकाशमा । नेपाली जनताले चनाखोपनलाई, राजनीतिक चेतनालाई दह्रो बनाउँदै एकताबद्ध भएन भने खतरा हुन पनि सक्छ ।’
