५ चैत, काठमाडौं । प्रधानमन्त्री तथा संसदीय दलका नेता केपी ओलीले बोलाएको नेकपा एमालेको संसदीय दलको बैठकमा जान भनेर हिडेका वरिष्ठ नेता माधवकुमार नेपाल र झलनाथ खनाल समूहका केही सांसद बीच बाटोबाटै फर्किएका छन्।
बैठकमा सहभागी हुन गएका केही सांसदहरु सिंहदरबारबाटै फर्किएको जनाइएको छ। प्रधानमन्त्रीको सरकारी निवास बालुवाटारमा बिहान ११ बजेका लागि संसदीय दलको बैठक बोलाइएको थियो।
स्थायी कमिटीका सदस्यबाहेकका सांसदहरु बालुवाटार जाने भनी हिँडेको भएपनि उनीहरु सिंहदरबारबाटै फर्किएका हुन्। राष्ट्रिय भेलामा व्यस्त भएकाले बिहीबारका लागि बोलाइएको संसदीय दलको बैठकमा सहभागी हुन नसक्ने एमाले नेपाल समूहले बुधबार नै जनाएको थियो।
प्रधानमन्त्री ओलीले सूर्य चुनाव चिह्नबाट चुनाव जितेका सबैलाई संसदीय दलको बैठकमा बोलाइएका थिए। सर्वोच्च अदालतले नेकपामा आवद्ध एमाले र माओवादी केन्द्रलाई पहिल्यैको अवस्थामा फर्काइदिएपछि दुवैपक्ष आआफ्नो कित्तामा फर्किएका छन्।
