फागुण २१ काठमाण्डौं । नेकपाको प्रचण्ड–माधव समूहले अध्यक्ष पुष्पकमल दाहाल संसदीय दलको नेता चयन गरेको छ । सिंहदरबारमा शुक्रबार बसेको सो समूहको संसदीय दलको बैठकबाट प्रचण्डलाई दलको नेतामा चयन गरिएको नेता सोमप्रसाद पाण्डेले जानकारी दिए ।
यसअघि पुस ९ गते संसदीय दलको नेता चयन गरिएकोमा सर्वोच्च अदालतले प्रतिनिधिसभा विघटनको अवधिलाई शून्य समय मानेको कारण आजको बैठकले फेरि प्रचण्डलाई संसदीय दलको नेता चयन गरिएको हो ।
प्रचण्ड माधव समूहले प्रधानमन्त्रीसमेत रहेका संसदीय दलका नेता केपी शर्मा ओली, उपनेता सुवास नेम्वाङ, सचेतक शान्ता चौधरी लगायतलाई हटाएकोबारे बिहीबार संघीय संसद् सचिवालयलाई जानकारी गराएको थियो ।
यस्तै आइतबार बस्ने प्रतिनिधि सभा बैठकमा प्रधानमन्त्री केपी शर्मा ओलीविरुद्ध अविश्वासको प्रस्ताव दर्ता गर्ने तयारी गरेको छ । वरिष्ठ नेता झलनाथ खनालले आफ्नो पक्षमा १ सय ११ जना सांसदले उपस्थित भएर हस्ताक्षर गरेको जानकारी दिएका छन् । आफ्नो पक्षमा ११५ जना सांसद रहेको र विभिन्न कारणवस योगेश भट्टराई, कृष्णबहादुर महरा, विना पोखरेल र चक्रपाणी खनाल भने आजको बैठकमा अनुपस्थित हुन नसकेकोको उनले बताए ।
