फागृण १४ काठमाडौं । सडक विस्तारको नाममा अन्यायपूर्ण ढंगबाट विस्थापित गराइएको भन्दै पीडितहरूले विरोध प्रदर्शन गरेका छन् ।
विभिन्न नागरिक संगठनहरूको आयोजनामा आज माइतीघर मण्डलामा विरोध प्रदर्शन गरिएको हो । सडक विस्तारका क्रममा काठमाडौंका आदिवासी नेवारहरूलाई विस्थापित गरिएको र सभ्यताको समेत विनास भइरहेकाले आन्दोलन गरिएको अभियान्ताहरुले बताएका छन् ।
बालाजु बाइपासमा रहेका ४८ घरधुरीलाई सरकारले अन्यायपूर्ण रूपमा विस्थापित गराएको पीडितहरूको गुनासो छ । सर्वोच्च अदालतको अन्तरिम आदेश समेत नमानेर मुआब्जा र क्षतिपूर्तिविना सरकारले घर भत्काएको पीडितहरूको आरोप छ ।
घर भत्काउन अवरोध गर्दा घरधनी तथा अभियन्ताहरूलाई प्रहरीले हिरासतमा लिएको भन्दै उनीहरूलाई विनाशर्त रिहाइको माग गर्दै आन्दोलन गर्नुपरेको उपत्यकाव्यापी सडक पीडित संघर्ष समितिले जनाएको छ ।
मातृभाषा बोलेकै कारण बालाजु बाइपासस्थित स्थानीयलाई प्रहरीले धरकपड गरी नियन्त्रणमा लिएको नेवाः देः दबुः का अध्यक्ष नरेश ताम्राकारले बताउनुभयो । सरकारले सर्वोच्च अदालतको अन्तरिम आदेशलाई समेत लत्याएर घरहरू भत्काएको उहाँको भनाइ छ ।
वर्षौंदेखि सरकारी निकायसँग सिफारिस लिइ बनाएको घर तथा कानूनी रूपमा पनि आफूहरूको जित भएको भए पनि राजनीतिक कारण घर भत्काइएको पीडितको आरोप छ ।
