फाल्गुन ५ वैतडी । वैतडीकी भागरथी भट्टको बलात्कार गरी हत्या गरेको अभियोगमा पक्राउ परेका छिमेकी दिनेश भट्टलाई हिरासतमा राखेर अनुसन्धान गर्न अदालतले थप पाँच दिनको समय दिएको छ । उनलाई प्रहरीले आजै पत्रकार सम्मेलन गरी सार्वजनिक गरेको थियो ।
दिनेश भट्ट भागरथी पढ्ने सनातन धर्म माविमा कक्षा ११ अध्ययन गर्दै आएका थिए ।
भागरथीका दाइ केशवराज भट्टले बुधबार बिहान आरोपी भट्टविरुद्ध किटानी जाहेरी दर्ता गराएका छन् । उनले प्रहरीसगँ बयानका क्रममा घाँटी थिचेर हत्या गरेको स्वीकार गरेको डिआईजी उत्तम सुवेदीले जानकारी दिए । सुवेदीकै नेतृत्वमा प्रहरीले व्यापक अनुसन्धान पछि भट्टलाई घटनाको १३ औं दिनमा नियन्त्रणमा लिन सफल भएको थियो ।
दोगडाकेदार गाउँपालिका–७ चडेपानीकी १७ वर्षीया किशोरी भागरथीको शव माघ २२ गते खोचलेक–चडेपानी ग्रामीण सडकखण्डको लवलेक जंगलमा सडकबाट १ सय मिटर तल झाडीमा फेला परेको थियो ।
सो घटना पछि निर्मला पन्तको जस्तै अवस्था नआवोस् भनेर शुरुदेखि नै सजग बनेको प्रहरीले प्रमाणहरु संकलन गरी अभियुक्तलाई नियन्त्रणमा लिएर कार्बाही अघि बढाउन सफल भएको हो ।
यस घटनाका अभियुक्त सार्वजनिक भएसगँै चौकीमा पुगेर बसेका डिआईजी सुवेदीलाई स्थानीयवासीले फुलमाला लगाएर बिदाई गरेका थिए ।
