माघ २९ बिराटनगर । घरबाट पिशाब फेर्न निस्किएकी एक बालिकालाई अपहरण गरी बलात्कार गरेर बेहोस् अवस्थामा छाडेर बलात्कारी भारततर्फ भागेको पुष्टी भएको छ । यो घटना मोरङको जहदा गाँउपालिकाको हो । सोमबार राति विराटनगरमा मोटरसाइकलमा आएका दुई युवाले अपहरण गरी १४ वर्षीय बालिकालाई बलात्कार गरेको प्रहरीले बताएको छ ।
जहदा गाउँपालिका १ घर भएकी बालिकालाई राति करिब साढे ९ बजेतिर मोटरसाइकलमा जबर्जस्ती लगेको देखेपछि छिमेकीले आफन्तलाई खबर गरेका थिए । राति ११ बजेसम्म छोरी घर नफर्केपछि हल्लाखल्ला गर्दै छिमेकी र आफन्त खोजीमा निस्किए । त्यसको दुईघण्टापछि बालिका अतालिँदै घर आइपुगिन् ।
स्थानीयका अनुसार मोटरसाइकलमै ल्याएर बालिकालाई घरनजिक छाडिदिएपछि बलात्कारी भागेका थिए ।
त्यसपछि खोजी थालेको प्रहरीले बलात्कारमा संलग्नको पहिचान भएको जनाएको छ । मोरङका प्रहरी प्रवक्ता डीएसपी लोकदर्शन थापाले घटनामा संलग्न जहदा १ का २२ वर्षीय दीपेश कुमार यादव र २१ वर्षीय अजय बैठाको खोजी गरिरहेको बताउनुभयो । दुवै जना गाउँबाट फरार भई भारततिर भागेको बताईएको छ ।
