माघ १९ जनकपुर । प्रधानमन्त्री केपी शर्मा ओलीले निर्वाचन कुनै पनि हालतमा पर नसर्ने भन्दै तयारीमा लाग्न आग्रह गरेका छन् । आज ढल्केबर सबस्टेसनको उद्घाटन पछि आयोजित कार्यक्रममा बोल्दै प्रधानमन्त्रीले तोकिएको मिति भन्दा निर्वाचन एक दिन पनि पर नसर्ने बताए । निर्वाचन आयोगले चुनावको तयारी तीव्र रुपमा गरिरहेकाले चुनाव हुनेमा ढुक्क हुन आग्रह गरे ।
उनले प्रचण्ड र माधव नेपाललाई लक्षित गर्दै प्रधानमन्त्री खान पाँउला भनेर दौडिएको भन्दै दशा लागेको टिप्पणी गरे । अहिले दशा लागेछ, चोक्टा खान गएकी बुढी झोलमा डुबिन् भने जस्तै भएको छ, प्रधानमन्त्रीले भने ।
उनले पार्टी भित्र उपद्रो गर्ने, सरकार र पार्टीलाई गाली गर्नेहरु अलग भएको बताए ।
प्रधानमन्त्रीले आफूलाई मधेश बिरोधी भनेर हल्ला गरिएको भन्दै मधेशको वास्तविक विकास आफूले नै गरीरहेको बताए । सिँचाई, ढल, बाटो सबै काम भईरहेका छन्, अहिले ६ लेनको बाटो भए पछि जनता खुसी छन्, उनले भने ।
