नेपालगन्ज, ४ माघ । नेपाल कम्युनिस्ट पार्टीका अध्यक्ष माधवकुमार नेपालले केपी ओली महाभारतका खलपात्र दुर्योधन जस्तै भएको टिप्पडि गरेका छन् ।
नेकपा बाँकेले आइतबार नेपालगन्जमा आयोजना गरेको जिल्लास्तरीय अगुवा कार्यकर्ता भेला तथा प्रशिक्षण कार्यक्रमलाई सम्बोधन गर्दै नेता नेपालले ओलीले हारिसक्दा पनि दम्भ र अहंकारले अन्तिम अवस्थामा युद्ध लडिरहेका दुर्योधन जस्तै भएर अघि बढेको बताए ।
दुर्योधनको जस्तै प्रवृत्ति बोकेका व्यक्ति केपी ओली भएको भन्दै उनले भने , ‘ओलीको अब फुर्ती चल्नेवाला छैन ।’
नेता नेपालले ओलीको नेकपालाई ‘धुन्धुकारी’, ‘मेला, झमेला भएको माछा बजार’ र जात्राको संज्ञा पनि दिए । उनले ओलीले थप गरेका केन्द्रीय सदस्यलाई जात्रामा सहभागी व्यक्तिको रुपमा टिप्पणी गरे ।
नेता नेपालले ओलीको पार्टी काठमाडौंमा भएका जात्रा जस्तै भएको टिप्पडि गर्दै जात्रामा सामेल हुनु र सदस्य बनिहाल्न समेत सुझाए । ,
उनले केपी ओलीका कार्यकर्ता डम्मरु बजाउँदै नेपालगन्जमा पनि युवा, विद्यार्थी र मजदुर किसानको केन्द्रीय सदस्य बाँड्न आउन सक्ने भएकाले सतर्क रहन आग्रह गरेका थिए । उनको केपीको वकालत गर्नेहरुलाई भने साइबर सेना र रावण सेना भएको पनि बताए ।
उनले नेकपाको केन्द्रीय सदस्यमध्ये ७० प्रतिशत आफ्नो पक्षमा भएकाले पार्टीको नाम र चुनाव चिह्न सूर्य आफूहरुले नै पाउने पनि दाबी गरेका थिए ।
सोही कार्यक्रममा नेकपा प्रवक्ता नारायणकाजी श्रेष्ठले पनि निर्वाचन आयोगले आफूहरु रहेको पार्टीलाई सूर्य र पार्टीको नाम दिनुको विकल्प नभएको दाबी गरेका थिए ।
कार्यक्रममा नेकपा स्थायी कमिटी सदस्यद्वय युवराज ज्ञवाली र वर्षमान पुन लगायतका नेताले संसद विघटनाका विरुद्धमा गाउँ तहबाटै कार्यकर्ता आन्दोलित हुन आव्हान गरेका थिए।
