पुष २५ काठमाण्डौं । राष्टपति र प्रधानमन्त्रीमाथि सुरक्षा खतरा बढेको भन्दै सुरक्षाकर्मीको संख्या विस्तार गरिएको छ ।
संसद विघटन र मध्यावधि निर्वाचनको घोषणापछि राष्ट्रपति विद्यादेवी भण्डारी र प्रधानमन्त्री केपी शर्मा ओलीमाथि सुरक्षा चुनौति बढेको विश्लेषण सुरक्षा निकायले गरे पछि सुरक्षाकर्मी बढाईएको हो ।
राष्ट्रपतिलाई भन्दा पनि प्रधानमन्त्री बाहिर धेरै हिँड्ने भएकाले उनको सुरक्षामा बिशेष सतर्कता अपनाईएको गृहस्रोतले बतायो । बालुवाटारमा पनि सेना सहितको सुरक्षाकर्मीको संख्या बढाईएको छ । सेना, प्रहरी, शसस्त्र र अनुसन्धानका गरी ९० जना यस अघि प्रधानमन्त्रीको सुरक्षामा खटिदै आएका थिए । अहिले सुरक्षाकर्मी थपेर झण्डै पहिलेको भन्दा दोब्बर सेना मात्रै तैनाथ गरिएको छ भने प्रहरी र शसस्त्र प्रहरीबाट पनि जनशक्ति थपिएका छन ।
प्रधानमन्त्रीलाई कालो झण्डा देखाउने, विरोध प्रदर्शन गर्ने र भविष्यमा ढुंगामुडा समेत हुन सक्ने भएकाले सतर्कता अपनाउन प्रधानमन्त्री जाने कार्यक्रम स्थल र बाटोलाई पनि सुरक्षानिकायले निगरानी बढाउने योजना बनाएका छन् ।
प्रधानमन्त्रीको कार्यकममा जानेले कालो मास्क, कालो कपडा लगाउन नपाउने यस अघि पनि सुझाव दिईएको थियो ।
यस्तै ओली समुहका अन्य नेता र प्रचण्डबाट ओलीमा सामेल भएर मन्त्री बनेकाहरुलाई पनि सुरक्षाकर्मी बढाईएको छ ।
विभिन्न दलले संसद विघटनको बिरोध गर्दै आन्दोलन जारी राखेका बेला प्रधानमन्त्री, मन्त्री देखि नेता सम्मको सुरक्षा बढाईएको हो ।
