११ पुस,चितवन । प्रतिनिधिसभा विघटन पछि दुई टुक्रामा विभाजित नेपाल कम्युनिष्ट पार्टीको भौतिक सम्पति कस्ले नियन्त्रणमा लिने भन्ने होड चलेको छ । यसै क्रममा आज बिहानै चितवनको पार्टी कार्यालयमा पनि ओली समूहले ताला लगाएको छ ।
बिहान पार्टी कार्यालयमा पुगेका ओली समूहका कार्यकर्ताले पार्टी कार्यालयबाट गुट चलाएको आरोप लगाउँदै ताला लगाएका छन् ।
अनेरास्ववियु चितवनका अध्यक्ष प्रकाश आचार्यले साविक एमालेको पार्टी कार्यालय रहेको मदन आश्रति भवनलाई कुनै एक पक्षको गुटको कार्यालय बनाइएकोले ताला लगाइएको जानकारी दिए ।
उनीहरुले भवनको मूल गेटमा विज्ञप्ति टाँसेर ताला लगाउनुको कारण उल्लेख गरेका छन् । चितवनको नेकपा जिल्ला कमिटीमा भने प्रचण्ड माधव समूहको बहुमत छ ।
जिल्लामा ओली पक्षका कार्यकर्ताले प्रधानमन्त्रीको कदमको स्वागत गर्दै दीप प्रज्वलन गर्ने र प्रचण्ड माधव समूहले राँके जुलुस र विरोध प्रर्दशन गरेका छन् ।
