मंसीर २५ रसुवा । कानको सानो मुन्द्रा चोर्नका लागि रसुवामा एक ६ बर्षे बालिकाको अपहरण पछि हत्या भएको खुलेको छ । ररसुवाको कालिका गाउँपालिका–१ फैलिगाङ की ६ वर्षीया बालिका सुमिना तामाङको अपहरणपछि हत्या गरेको आरोपमा १९ वर्षे युवती पक्राउ परेकी छिन् । ग्राङ प्राविमा अध्ययनरत सुमिना आइतबारदेखि हराए पछि परिवारले दिएको उजुरीका आधारमा प्रहरीले खोजी शुरु गरेको थियो ।
खोजी गर्दा कालिका गाउँपालिका–१ स्थित नागुर्दुङ भीरको ओढारमा घाँसले छोपिएको अवस्थामा सुमिनाको शव मंगलबार भेटिएको प्रहरीले बताएको छ । बालिकाको झोला, चप्पल र शवनजिकै झाडीमा रहेको पाईएको थियो ।
बालिकाको अपहरणपछि हत्या गरेको अभियोगमा प्रहरीले नुवाकोटको किस्पाङ गाउँपालिकाकी १९ वर्षीया सपना तामाङलाई पक्राउ गरेर अनुसन्धान शुरु गरेको छ । उनले बयानका क्रममा बालिकाको हत्या गरेको स्वीकार गरेकी छन् ।
बालिकाले लगाएको सुनको मुन्द्रा चोरी गर्ने उद्देश्यले सपनाले अपहरण गरी एकान्त ठाउँमा लगेर घाँटीमा डोरीले कसी क्रुर तरिकाले हत्या गरी लुकाइछिपाइ राखेको पाइएको प्रहरीले जनाएको छ ।
सपना यस अघि पनि पटक पटक सुन चोरी मुद्धामा पक्राउ परीसकेको पाईएको छ ।
