मंसीर २३ मोरङ । मोरङको उत्तरी क्षेत्र मिक्लाजुङमा एक शिक्षकको गोली हानेर हत्या भएको छ । मिक्लाजुङ गाउँपालिकाका वडा नम्बर १ का ५४ वर्षीय शिक्षक राजेन्द्र श्रेष्ठको हत्या भएको मोरङ प्रहरीले जनाएको छ ।
श्रेष्ठ स्थानीय सरस्वती आधारभूत स्कुलका प्रधानाध्यापक रहेको बताइएको छ । उनलाई बिहान अपहरण गरेर जंगलमा लगेर हत्या गरिएको बताईएको छ ।
प्रहरी अझै घटनास्थलमा पुगिनसकेको खबर छ । हामीलाई ९ बजेतिर खबर प्राप्त भयो, मोरङ प्रहरीका प्रवक्ता प्रहरी नायव उपरीक्षक लोकदर्शन थापाले भन्नुभयो–घटना भएको स्थानमा हालसम्म पनि प्रहरी पुगेको छैन । उर्लाबारी र टाँडीबाट हिडेको टोलि समेत भर्खरै रमितेमा पुगेको प्रवक्ता थापाले बताउनु भयो । प्रहरीले नेत्र विप्लव नेतृत्वको नेकपाका कार्यकर्ताले अपहरण पछि शिक्षकको हत्या गरेको आशंका गरिएको जनाएको छ । यद्यपि, सो पार्टीले कुनै प्रतिकृया सार्वजनिक गरेको छैन । घटनाको बारेमा थप अनुसन्धान गर्नका लागि जिल्ला प्रहरी कार्यालय मोरङका प्रहरी नायव उपरीक्षक थापासहितको टोलि समेत घटनास्थलतर्फ लागेको छ ।
मिक्लाजुङ गाँउपालिकाका अध्यक्ष देवी प्रसाद आचार्यले अज्ञात समुहले शिक्षकलाई अपहरण गरेको केही समयमै हत्या भएको जानकारी आएकाले आफूहरु घटनास्थलतर्फ जाँदै गरेको बताए ।
