मंसिर ९, बैतडी । बैतडीको दशरथचन्द नगरपालिका–१० बुड्डामा आज जिप दुर्घटना हुँदा ५ जनाको मृत्यु भएको छ । दिउँसो साढे १ बजे ना १ ज २१९६ नम्बरको जीप सडकबाट खसेर दुर्घटना हुँदा पाँच जनाको मृत्यु भएको र अन्य ४ जना घाइते भएको जिल्ला प्रहरी कार्यालय बैतडीले जनाएको छ ।
दुर्घटनामा परि बैतडीको दशरथचन्द नगरपालिका–५ बस्कोटकी पार्वती चन्द , पाटन नगरपालिका–५ की पार्वतीदेवी चन्द , पाटन नगरपालिका–५का भगिरथ पाण्डेय, दशरथचन्द नगरपालिका–२ देहिमाडौंका कृष्ण लावड र सुनर्या गाउँपालिका–४ की कलावती चन्दको मृत्यु भएको बैतडीका प्रहरी प्रमुख प्रहरी नायब उपरीक्षक नारायणप्रसाद अधिकारीले बताए । मृतक र घाइतेहरु सबै भारतीय बजार झुलाघाटबाट पेन्सन बुझेर फर्कदै गरेकाहरु रहेको प्रहरीले बताएको छ ।
मृतक कृष्ण लावड ५८ वर्षका छन् भने अन्य सबै ७० वर्षमाथिका रहेका प्रहरी डीएसपी अधिकारीले बताए । घाइतेहरुको जिल्ला अस्पताल बैतडीमा उपचार भइरहेको छ । जीपमा सवार २ जना भने सकुसल रहेका छन् ।
