काठमाण्डौं कार्तिक १८ । नेपालमा दिन दिनै बढीरहेका कोरोना संक्रमितको संख्या एक लाख ८० हजार नजिक पुगेको छ ।
आज थप ३ हजार ११४ जनामा कोरोना संक्रमण पुष्टि भएको छ । २४ घण्टामा जम्मा ११ हजार १६६ जनामा परीक्षण गर्दा ती संक्रमित देखा परेको स्वास्थ्य मन्त्रालयले जनाएको छ । यही दरमा संक्रमित बढ्दै गए केही दिन दिनमै २ लाख नाघ्न सक्ने अनुमान शुरु भएको छ ।
स्वास्थ्य मन्त्रालयका अनुसार हालसम्म नेपालमा संक्रमितको संख्या १ लाख ७९ हजार ६१४ पुगेको छ । त्यसैगरी २४ घण्टामा ३ हजार १४२ जना कोरोना संक्रमणबाट निको भएर डिस्चार्ज भएका छन् । योसँगै निको हुनेको १ लाख ४१ हजार १३४ संख्या पुगेको छ । देशभरी सक्रिय संक्रमितको संख्या हालसम्म ३७ हजार ४७६ छ ।
मन्त्रालयका अनुसार हालसम्म पीसीआर विधिबाट १४ लाख ८० हजार ९७८ परीक्षणहरु गरिएका छन् । हालसम्म क्वारेन्टाइनमा रहनेको संख्या १ हजार २७७ जना रहेका छन् ।
देशभर कोरोनाबाट एक हजार ४ जनाको मृत्यु भएको छ ।
