सुर्खेत कार्तिक ७ । आफैले गरेको निर्णय आफै लागू नगर्ने, पार्टीले आधिकारीक रुपमा गरेका निर्णय लागू नगरेको भन्दै प्रचण्ड र माधव नेपाल पक्ष मिल्दा नेकपा भित्र ओली पक्ष अल्पमतमा पर्ने यस अघि पनि पुष्टी हुँदै आएको थियो । तर यस पटक कर्णाली प्रदेशमा प्रचण्ड र माधव नेपाल पक्षले एक ढिक्का भएर मुख्य मन्त्री रिुद्धको अविस्वास प्रस्ताव अस्वीकृत गरेर ओली पक्षलाई झड्का दिएको छ ।
प्रधानमन्त्री ओलीकै सहमतिमा यामलाल कँडेल समुहले कर्णालीका मुख्यमन्त्री महेन्द्र बहादुर शाही विरुद्ध १८ जना सांसदको हस्ताक्षर संकलन गरेर दर्ता गराएका थिए ।
तर प्रचण्ड र नेपालको सक्रियतामा दुबै पक्षका करीब ९ जना सांसदले हस्ताक्षर फिर्ता लिए पछि ओली पक्ष अल्पमतमा परेसगैँ मुख्य मन्त्री परिवर्तन गर्ने ओली पक्षको योजना असफल भएको छ ।
वालुवाटारमा दुबै पक्षबीचको तनाव चलिरहेका बेला कर्णालीमा देखा परेको नजिर लागू भएमा प्रदेश नं १, बागमति प्रदेश र लुम्वीनी प्रदेशमा समेत दुई समुहले चाहेमा संसदीय दलको नेता फेरेर मुख्य मन्त्री परिवर्तन गर्न सक्ने देखिएको छ । तर दुबै पक्ष पार्टी मिलाउने रणनीतिमै रहेकाले यो कदम भने चालिहाल्ने स्थितिमा नपुगेको स्रोतले बताएको छ ।
नेपाल कम्युनिष्ट पार्टी (नेकपा) को कर्णाली प्रदेश संसदीय दलको बैठकले मुख्यमन्त्रीसमेत रहनुभएका दलका नेता महेन्द्रबहादुर शाहीविरुद्ध दर्ता भएको अविश्वासको प्रस्ताव बहुमतले अस्वीकृत गरेको छ । प्रदेशसभा सचिवालयस्थित दलको कार्यालयमा आज बसेको बैठकले ध्वनिमतका आधारमा उक्त प्रस्ताव अस्वीकृत गरेको हो ।
प्रदेशसभा सदस्य एवं नेकपा कर्णाली प्रदेशका सहइञ्चार्ज यामलाल कँडेल नेतृत्वमा १८ सदस्यले गत असोज २५ गते संसदीय दलमा मुख्यमन्त्रीविरुद्ध अविश्वासको प्रस्ताव दर्ता गरिएको थियो । उक्त प्रस्तावबाट सात सदस्यले हस्ताक्षर फिर्ता लिएलगत्तै पार्टी अध्यक्षद्वय केपी शर्मा ओली र पुष्पकमल दाहाल ‘प्रचण्ड’ले विवाद समाधानका लागि मुख्यमन्त्रीसहित दुवै पक्षका नेताहरुलाई काठमाडौंँ बोलाउनुभएको थियो । कर्णालीको विवादबारे दुई अध्यक्षबीच सहमति नजुटेपछि मुख्यमन्त्री शाहीले सुर्खेत फर्किएर दलको बैठक बोलाउन प्रमुख सचेतक सीता नेपालीलाई निर्देशन दिनुभएको थियो ।
आफूविरुद्ध अविश्वासको प्रस्ताव ल्याउन सहयोग गरेको आरोपमा मुख्यमन्त्री शाहीले प्रमुख सचेतक गुलाबजङ्ग शाहलाई पदमुक्त गरी नेपालीलाई प्रमुख सचेतकको जिम्मेवारी तोक्नुभएको थियो । बैठकमा पूर्वमाओवादी पक्षका १० र पूर्वएमालेका माधवकुमार नेपाल नजीकका आठ जना गरी १८ सदस्यले ध्वनिमतका आधारमा उक्त प्रस्तावमाथि मतदान गरेका थिए । प्रमुख सचेतक नेपालीले मत घोषणा गर्दै दलका नेताविरुद्धको अविश्वासको प्रस्ताव बहुमतबाट अस्वीकृत भएको जानकारी दिनुभयो ।
मुख्यमन्त्रीविरुद्धको अविश्वासको प्रस्तावमाथि छलफल गर्ने दलको बैठकमा उपसभामुख पुष्पा घर्ती तथा मन्त्रीद्वय दल रावल र नन्दसिं बुढा अनुपस्थित हुनुहुन्थ्यो । घर्ती पूर्वमाओवादी खेमा र मन्त्रीद्वय पूर्वएमालेका प्रधानमन्त्री ओली नजीकका मानिनुहुन्छ । त्यस्तै अविश्वासको प्रस्तावमा हस्ताक्षर गर्ने कँडेलसहित ११ सदस्य पनि अनुपस्थित थिए । कँडेल समूहले आजको बैठकलाई अवैधानिक बताउँदै बहिष्कार गरिएको जनाएको छ । आजको बैठकमा १८ सदस्य उपस्थित थिए । कर्णाली प्रदेशसभामा सभामुखबाहेक नेकपाका ३२ सदस्य छन् । मुख्यमन्त्रीविरुद्धको अविश्वासको प्रस्तावमाथिको मतदानमा १८ उपस्थित थिए भने इतरसमूहका १४ सदस्यले बैठक बहिष्कार गरेका थिए ।
