असोज २९ काठमाण्डौं । अत्याधिक बिरामीको चाप रहने धरानको विपी कोईराला स्वास्थ्य विज्ञान प्रतिष्ठानमा बिरामीको भर्ना र उपचारमा गंभीर लापरबाही एक पछि अर्को देखिदै गएका छन् ।
गत असोज ४ गते झापाकी पवित्रा देवी तिम्सिनालाई भर्ना नगरी तीन घण्टा भन्दा बढी समय एम्बुलेन्समै राखेका कारण ज्यान गएको घटना सेलाउन नपाउदै आज पुनः अर्को एक बिरामीलाई भर्ना लिन नमान्दा अस्पताल बाहिर ज्यान गएको छ ।
धरान–९ का ५८ वर्षिय पुरुषलाई प्रतिष्ठानले भर्ना लिन अस्वीकार गरेपछि प्रतिष्ठानको कोभिड अस्पताल बाहिर मृत्यु भएको आफन्तले बताएका छन् ।
पटक पटक संक्रमित पुरुषलाई भर्ना गर्न अनुरोध गर्दासमेत प्रतिष्ठानका चिकित्सकहरुले ती पुरुषलाई भर्ना नगरेको धरान– ९ का वडाअध्यक्ष रत्न कट्वालले जानकारी दिए ।
अस्पताल प्रशासन र चिकित्सकहरुले गैर जिम्मेवार तरिकाले विरामीहरु भर्ना लिन आनाकानी गर्ने, अस्वीकार गर्ने गरेर समयमै उपचार नपाउदा बिरामीको ज्यान जाने गरेको छ ।
प्रतिष्ठानका उपकुलपति ज्ञानेन्द्र गिरी र केही पदाधीकारीले सरकारले दिएको करोडौं रुपैयामा अनियमितता गरेर भेन्टिलेटर र औषधीहरु कमसल प्रयोग गरेका कारण खेलवाड भएको भन्दै अख्तियारमा समेत उजुरी पछि छानविन गरीरहेको छ । उपकुलपति गिरी ओलीले नियुक्त गरे यता नै उनले गरेका निर्णयहरुको आलोचना हुदै आएको छ ।
