सिन्धुली, २५ असाेज । जनप्रतिनिधि, कर्मचारी र स्थानीयमा कोरोना भाइरस भेटिएपछि सिन्धुलीका कमलामाई नगरपालिका, दुधौली नगरपालिका र गोलन्जोर गाउँपालिकाका अत्यावश्यक बाहेकका सम्पूर्ण सेवा बन्द गरिएको छ।
तीनवटै स्थानीय तहले सूचना जारी गर्दै नगर र गाउँपालिका मातहतका सबै कार्यालयमा आइतबारबाट अत्यावश्यक बाहेकका सम्पूर्ण कार्य बन्दगर्ने निर्णय गरेका हुन् । कमलामाई नगरपालिका ८ का वडा अध्यक्ष टिकाबहादुर मोक्तान, प्रमुख प्रशासकिय अधिकृत विशकसेन ढकाल समेतलाई कोरोना संक्रमण भएपछि कात्तिक ३ गतेसम्मका लागि अत्यावश्यक बाहेकका सेवा बन्द गर्ने निर्णय गरेको नगरपालिकाका प्रमुख खड्गबहादुर खत्रीले बताए ।
यस्तै बिहीबार दुधौली नगरपालिकामा रहेको सेन्चुरी बैंकका ५ जना कर्मचारी र क्वारेन्टाइनमा रहेका एकजना व्यक्तिमा कोरोना संक्रमण देखिएपछि नगरपालीकाभित्र रहेका सबै कार्यालय, संघसंस्था तथा वित्तिय संस्था लगायतका सेवाहरु बन्द गरिएको छ । नगरपालिका र सो मातहत रहेका सबै कार्यालयको सेवा कार्तिक १ गतेसम्मका लागि बन्द गरिएको दुधाैलीका मेयर घनश्याम राउतले बताए ।
नगरपालिकामा चल्ने यातायातलाई भने मापदण्ड पालना गरि संचालन गर्न र व्यापारीहरुलाई स्वास्थ्य सुरक्षा अपनाउन भनिएको छ । यस्तै सिन्धुलीकै गोलन्जोर गाउँपालिकाले पनि आफ्ना केही कर्मचारीमा कोरोना भाइरसको संक्रमण पुष्टि भएको भन्दै आइतबारबाट लागु हुनेगरी अर्को सूचना नभएसम्मका लागि सम्पूर्ण सेवा बन्द गरेको जनाएको छ ।
कन्ट्याकट ट्रेसिङका आधारमा स्वाब संकलन गरी पीसीआर परीक्षणका लागि पाठउने तयारी भएकाले रिपोर्ट नआउँदासम्मका लागि पालिका र मातहतका सम्पूर्ण कार्यालयका सेवा बन्द गरीएको प्रमुख प्रशासकिय अधिकृत अर्जुन दर्जीले जानकारी दिए ।
