असोज २२ काठमाडौँ । काठमाण्डौंमा दिनहुँ बढीरहेको संक्रमणको दरलाई लिएर सरकारले चिन्ता जनाएको छ । उपत्यकामा यही दरमा संक्रमण बढ्दै जाने हो भने अब अस्पतालहरुले बिरामीको भार थेग्न नसक्ने सरकारले बताएको छ ।
स्वास्थ्य मन्त्रालयका पवक्ता डा. जागेश्वर गौतमले अस्पतालहरुमा बिरामीको चाप बढे पछि बिरामीहरुलाई बेडको अभाव हुन थालेको बताए ।
निजी अस्पतालहरुले कोरोनाको उपचार व्यवस्थापन गर्नु पर्ने उनले बताए ।
सार्वजनिक स्थलमा भीडभाड, नाक मुख छोपिने गरी मास्क नलगाउनु, सामाजिक दुरीको पालना नहुनु, हातको सफाईमा उचित ध्यान नदिनु जस्ता कारणले संक्रमण बढीरहेको पनि डा. गौतमले बताए ।
किनमेलका लागि देखिएको भीड हेर्दा मान्छेले कोरोना बिर्सेको हो कि जस्तो देखिने गरेको पनि उनले बताए ।
राजधानीमै बिरामीले बेड पाउन अभाव हुनु र संक्रमण दैनिक १५ सय भन्दा बढीका दरले देखिनुले काठमाण्डौ कति जोखिममा छ भन्ने कुराको संकेत गर्दछ ।
त्यसैले सरकारले दशैमा आवत जावत नगर्ने, ६० वर्ष माथिका वृद्ध वृद्धाहरुलाई घरबाट ननिस्कन र मास्क अनिवार्य लगाउन अपील गरीरहेको छ । यसका बाबजुद राजधानीमा ठूलो भीडभाड भने देखा परीरहेको छ ।
यसको विकल्प अब सरकारले के गर्ला त ? फेरी लकडाउन या अरु कनै विकल्प निकाल्ला ?
निजी क्षेत्रले भने पुनः लकडाउन नगर्न सरकारसगँ माग गर्दै आएको छ भने सरकारले पनि लकडाउन भन्दा अरु नै विकल्प खोज्ने बताईरहेको छ ।
