काठमाडौं असोज २१ । कोरोना संक्रमणको महामारीका कारण हरेक क्षेत्र प्रभावित भएका बेला सर्वोच्च अदालत पनि प्रभावित छ । यसैको प्रभाव नेकपा उपाध्यक्ष वामदेव गौतमको राष्ट्रियसभामा मनोनयनविरुद्ध परेको रिटको सुनुवाइमा पनि परेको छ । गौतमविरुद्धको रिट बुधबारका लागि ‘हेर्दाहेर्दै’ अवस्थामा पेसी तय भएपनि सर्वोच्चमा इजलास गठन हुन नसक्दा सुनुवाइ अनिश्चित भएको हो।
सर्वोच्चका न्यायाधीश र अधिकृतहरूमा कोभिड संक्रमण देखिएपछि मुद्दाको सुनुवाइ रोकिएको हो। पीसीआर रिपोर्ट पोजिटिभ देखिएका न्यायाधीश पुरुषोत्तम भण्डारी र अरू अधिकृतको सम्पर्कमा रहेका प्रधानन्यायाधीश चोलेन्द्रशमशेर राणासहित अन्य न्यायाधीश होम आईसोलेसनमा रहेका छन् ।
संवैधानिक ईजलाशमा संलग्न न्यायधीशहरु नै आईसोलेसनमा रहेका कारण गौतमको बुद्धा फेरी अनिश्चित बनेको हो ।
यस अगाडि शुक्रबार सर्वोच्चको संवैधानिक इजलासमा वामदेवको तर्फबाट पूर्व महान्यायाधीवक्ता एवम् वरिष्ठ अधिवक्ता प्रा.डा.युवराज संग्रौला, वरिष्ठ अधिवक्ता रमनकुमार श्रेष्ठ, शेरबहादुर केसी, राघवलाल वैद्य लगायतले बहस गरेका थिए।
शुक्रबारको इजलासको सुनुवाइ सकिएको थियो। बहस बाँकी नै भएकाले अर्को सुनुवाइका लागि आजलाई पेशी तोकिएको थियो। आज वामदेव र सरकारका कानुन व्यवसायीको बहस पैरवी सकिएपछि रिट निवेदकका कानुन व्यवसायीले जवाफी बहस गर्ने तयारी थियो। दुवै पक्षको बहस सकिएपछि मात्र मुद्दाको निर्णय हुनेछ।
अधिवक्ता दिनेश त्रिपाठी र बद्रीराज भट्टले सर्वोच्च अदालतमा दायर गरेको दुई वटा रिट उपर असोज ७ गते न्यायाधीश आनन्दमोहन भट्टराईको इजलासले सांसदको हैसियतमा कुनै काम कारबाही नगर्न अन्तरिम आदेश दिएको थियो।
वामदेवको मुद्दा प्रधानन्यायाधीश चोलेन्द्रसमशेर राणासहित न्यायाधीश दीपककुमार कार्की, हरिकृष्ण कार्की, विश्वम्भरप्रसाद श्रेष्ठ र ईश्वरप्रसाद खतिवडा रहेको संवैधानिक इजलासमा छ।
७४ सालको निर्वाचनमा पराजीत भएका गौतम राष्ट्रिय सभामा मनोनित भए पछि उनको बिरुद्ध सर्वोच्चमा रिट परेको हो ।
सर्वोच्चको फैसलाका कारण वामदेवको मन्त्री हुने बाटो समेत अहिलेका लागि बन्द भएको छ ।
