काठमाडौँ , १७ असोज ।
सत्तारुढ दल नेपाल कम्युनिष्ट पार्टि (नेकपा)को शनिबारको लागि बोलाइएको सचिवालय बैठक स्थगित भएको छ ।
हिजो शनिबारको लागि डाकिएको बैठक स्थगित भएको एक नेताले जनाए । उनका अनुसार बैठक आइतबार ४ बजे बस्ने भएको छ । पार्टीका अध्यक्ष पुष्पकमल दाहालले बैठक सरेको जानकारी नेताहरुलाई गराएका थिए ।
बिहीबार अध्यक्ष एवम् प्रधानमन्त्री केपी शर्मा ओलीले मुख्यसचिव र दुइ देशमा राजदूत नियुक्त गरेपछि नेकपाभित्र विवाद उत्पन्न भएको थियो ।
स्थायी कमिटी बैठकको प्रस्तावअनुसार मन्त्रिपरिषद् पुनगर्ठन र राजनीतिक नियुक्तिका लागि प्रधानमन्त्री केपी शर्मा ओली र कार्यकारी अध्यक्ष दाहालबीच छलफल चलिरहेका बेला सहमतिबिनै सरकारले महत्त्वपूर्ण राजनीतिक नियुक्ति गरेपछि नेकपामा नयाँ विवाद शुरु भएको हो ।
अध्यक्ष दाहालसहित वरिष्ठ नेता झलनाथ खनाल, माधवकुमार नेपाल, उपाध्यक्ष वामदेव गौतम र प्रवक्ता नारायणकाजी श्रेष्ठले सरकारको पछिल्ला नियुक्तिलाई लिएर बैठकमा असन्तुष्टि राख्ने तयारी गरेका छन् ।
