काठमाडौं असोज ९ । देशभर केही दिनयता परिरहेको झरी उपत्यकामा भने बिहान कम देखिएको छ । बिहान केही स्थानमा घाम लागेको छ भने पानी पर्न रोकिएको छ । तर मौसम विज्ञान विभागका अनुसार आज पनि देशका विभिन्न भागमा भारी बर्षाको संभावना रहेको छ । भोलीबाट भने मौसममा सुधार आउने छ । बंगालको खाडीबाट भित्रिने पश्चिमी वायुको प्रभावले मौसममा सुधार आउने भएको हो।
मौसमविद् बरुण पौडेलले भारतको छत्तिसगढको उत्तर पश्चिम हुँदै भारतकै मध्यप्रदेशको पूर्वी क्षेत्रमा विकसित भएको न्यून चापीय क्षेत्र र नेपालमा मनसुन सक्रिय गराउने वायु दुई दिनपछि कमजोर हुने जानकारी दिए ।
पश्चिमी वायु सक्रिय भई पूर्वी वायुलाई धकेल्ने अवस्था बनेपछि मात्रै मनसुन अन्त्य हुन्छ। तर, यसपटक मनसुन सकिन अझै केही समय कुर्नुपर्ने पौडेलले बताए ।
देशभर अत्याधिक बर्षाका कारण नदीहरुमा बाढी आएको छ । पहाडी क्षेत्रमा पहिरोले जनधनको ठूलो क्षति भएको छ ।
