रौतहट , २० भदौ ।
दोषीलाई कारबाही र ‘न्याय देउ’ भन्दै निरन्जन, बिजय हत्याकाण्ड संघर्ष समितिले शनिबार चन्द्रनिगाहपुरमा प्रदर्शन गरेको छ । कोभिड १९ को संक्रमणका कारण जिल्लाभरी निषेधाज्ञा जारी रहे पनि संघर्ष समितिले आन्दोलनलाई जारी राखेको हो । प्रदर्शनका क्रममा उनीहरुले प्रहरीविरुद्ध चर्का नारा लगाए ।
गरुडा नगरपालीका ८ जिंगडीयाका २० वर्षीय निरन्जन रामको हत्यामा संलग्न रहेको आरोपमा स्थानीय बिजय महरालाई पक्रेर हत्या स्वीकार्न यातना दिँदा मृत्यु भएको भन्दै यहाँ दिनहुँ प्रदर्शन भइरहेको छ ।
बिजयको वीरगन्जमा भदौ १० गते उपचारका क्रममा मृत्यु भएको थियो । पोस्टमार्टमका लागि काठमाडौं लगिएको शव जिल्ला ल्याइएको छैन ।
निरन्जनको साउन ३१ गते राति घाँटी रेटेर हत्या भएको थियो । प्रहरीले हत्यामा संलग्न भएको भन्दै सोही गाउँका ७ जनालाई पक्रेर कर्तब्य ज्यान मुद्दा चलाइसकेको छ ।
पीडितले हत्यामा संलग्न भनेर समातेकामध्ये बिजय लगायत ५ जना निर्दोष भनिरहेको अवस्थामा प्रहरीले हत्या कबुल गराउन हिरासतमा यातना दिएर बिजयको मृत्यु भएपछि आन्दोलन चर्केको हो ।
घटनामा बिजयलाई यातना दिने प्रहरी ईन्स्पेक्टर नविनकुमार सिंह लगायत ३ जना निलम्बन भइसकेका छन् ।
पीडितले हत्याको निष्पक्ष छानबिन, हत्यामा संलग्न केही फरार रहेकाहरुलाई पक्राउ गर्नुपर्ने, क्षतिपूर्ति, मृतकलाई सहिद घोषणा लगायतका माग राखेर आन्दोलन गरिरहेका छन् ।
पीडित परिवारले घटनामा बिजय लगायत ५ जना निर्दोषलाई फसाउन खोजिएको भन्दै अन्यलाई बिना सर्त रिहा गरिनु पर्ने माग गरेका छन् ।
