रौतहट , १६ भदौ ।
रौतहटको गरुडा नगरपालिका–८ जिंगडियाका १७ वर्षीय युवक विजय रामको हिरासतमा मृत्यु भएपछि जिल्ला प्रहरी कार्यालय गौरका प्रहरी निरीक्षक (इन्सपेक्टर) नवीनकुमार सिंह र दुई हवल्दार निलम्बनमा परेका छन् ।
गृह मन्त्रालयले इन्सपेक्टर सिंह र प्रदेश २ प्रहरी कार्यालय जनकपुरले दुई जना हवल्दारलाई सोमबारदेखि ६ महिनाका लागि निलम्बन गरेको हो ।
प्रहरी निमावली २०७१ नियम ११५(४) बमोजिम थप अनुसन्धान तथा जाँचबुझ समाप्त नहुन्जेलसम्मका लागि इन्सपेक्टर सिंहलाई गृह मन्त्रालय (सचिवस्तर) को भदौ १५ गतेको निर्णयानुसार अनुसार निलम्बन गरिएको प्रदेश २ प्रहरी कार्यालयका प्रवक्ता डीएसपी अन्सु सिंहले बताए । ‘गृह मन्त्रालय, प्रहरी कर्मचारी प्रशासन शाखाको चलानी नम्बर ८९ को पत्रले थप अनुसन्धान र जाँचबुझ नसकिएसम्म ६ महिनाका लागि निलम्बन गरिएको हो,’ उनले भने, ‘निलम्बन गरिदिन हुन भनी जिल्ला प्रहरी कार्यालय, रौतहटको अनुरोधबमोजिम पत्र आएकोले पनि अनुसन्धानका लागि तीनैजना निलम्बनमा परेका हुन् ।’
वीरगन्जस्थित नेसनल मेडिकल कलेजको शय्याबाट उपचारका क्रममा विजयले मृत्युहुनु केही समयअघि सादा पोसाकका प्रहरीले आफूलाई निरन्जनको हत्या स्विकार्न रड, बाँसको फराठ्ठा र बुटले हानेर चरम यातना दिएको भिडियोमा बताएका थिए ।
पीडित परिवारले पनि तीनैजनालाई अनुसन्धानको दायरामा ल्याउनु पर्ने माग राखेका थिए । घटनाको निष्पक्ष छानबिन गरी दोषीमाथि कारबाही माग राख्दै गरुडास्थित प्रहरी कार्यालय अगाडि दिनहुँ प्रदर्शन भइरहेको छ ।
जिंगडियाका २० वर्षीय निरन्जन रामको साउन ३१ गते राति घाँटी रेटेर हत्या भएको थियो, र हत्यामा संलग्न रहेको आरोपमा साउन ३२ गते विजयलाई इलाका प्रहरी गरुडाले पक्राउ गरेको थियो ।
