काठमाडौँ भदौ ११ । नेपाललाई लोडसेडिङ मुक्त बनाएर उच्च प्रशसा बटुलेका नेपाल बिद्युत प्राधिकरणका कार्यकारी निर्देशक कुलमान घिसिङलाई फेरी पुनः नियुक्ति दिएको भनेर सामाजिक सञ्जालमा आएको बिषयलाई सरकारका प्रवक्ता एवं अर्थ तथा सञ्चार मन्त्री युवराज खतिवडाले ब्यग्यात्मक शैलीमा खण्डन गरेका छन् ।
सरकारको नियमित पत्रकार सम्मेलनमा मन्त्री खतिवडाले भने, उहाँलाई सामाजिक सञ्जालले नै नियुक्त दिएको होला, सरकारले दिएको छैन । सामाजिक सञ्जालले दिएको नियुक्ति सरकारलाई थाहा हुने कुरा भएन ।
खतिवडाले नेपाल विद्युत प्राधिकरणको कार्यकारी निर्देशकमा कुलमान घिसिङलाई पुनर्नियुक्ति दिनेबारे मन्त्रिपरिषद् बैठकमा कुनै छलफल नभएको दावी गरे ।
कुलमानको बारेमा औपचारीक प्रस्ताव पनि मन्त्रीपरिषद्मा नआएको र कुनै छलफल पनि नभएको मन्त्री खतिवडाले दाबी गरे ।
कुलमान घिसिङलाई पुननियक्ति दिईएको भन्दै सामाजिक सञ्जालमा बधाईको ओईरो लागेको थियो भने केही सञ्चार माध्यमले समाचार नै लेखेका थिए ।
भदौ २९ गते कार्यकाल सकिन लागेका कुलमान घिसिङलाई फेरि नियुक्त गर्नुपर्ने दबाब भने व्यापक बनेको छ ।
