भदौ १ काठमाडौँ । नेपाली काँग्रेसका सभापति शेर बहादुर देउवाले सिन्धुपालचोक जुगल गाँउपालिका लिदीका जनताले दश दिन अघि नै सुरक्षित स्थानमा सार्न माग गरे पनि सरकारले किन सुनेन भनेर प्रधानमन्त्री ओलीलाई प्रश्न गरेका छन् ।
प्रधानमन्त्री तथा नेकपाका अध्यक्ष केपी शर्मा ओली, नेकपाका अर्का अध्यक्ष पुष्पकमल दाहालसगँको भेटमा देउवाले यस्तो प्रश्न गरेका हुन् ।
लिदीको पहिरोमा परी २२ जनाको मृत्यु भएको छ भने १७ जना वेपत्ता छन् । उनीहरको खोजी भईरहेको छ ।
यसै गरी बालुवाटारमा आज भएको छलफलमा संवैधानिक निकायमा रिक्त पदबारे छलफल भएको काँग्रेस कार्यलयका सचिव कृष्ण प्रसाद पौडेलद्धारा जारी विज्ञप्तिमा उल्लेख छ ।
यति गम्भीर गल्तीको जवाफदेहिता सरकारले लिनु पर्ने देउवाको तर्क थियो ।
कांग्रेस सभापति देउवाले प्रधानमन्त्री ओलीसँग सिन्धुपाल्चोक पहिरो, कोरोना महामारी र त्रिभुवन विश्वविद्यालयमा देखिएका विवाद र विसंगतिबारे छलफल गरेको विज्ञप्तिमा उल्लेख छ ।
त्यस्तै कोरोना संक्रमणबाट मृत्यु हुनेको संख्या एक सय नाघे पनि सरकारले विगतका कमजोरीको समीक्षा गरेर कामको गति बढाउन नसकेको देउवाले आरोप लगाएका थिए ।
यस्तै आइसोलेसन र भेन्टिलेटरको पर्याप्त व्यवस्था गर्न देउवाले माग गरेका छन् ।
भेटमा कांग्रेसका केन्द्रीय सदस्य रमेश लेखकसमेत सहभागी थिए ।
