काठमाडौँ भदौ १ । नेकपा भित्र लामो समयदेखि जारी विवाद अन्त्य गर्न गठिन महासचिव विष्णु पौडेल नेतृत्वको कार्यदललाई सचिवालयले अनुमोदन गरेको छ । आज बालुवाटारमा बसेको सचिवालयको बैठकले दुई अध्यक्ष केपी शमा ओली र पुष्पकमल दाहालको सहमतिमा बनेको कार्यदललाई अनुमोदन गरेको प्रवक्ता नारायणकाजी श्रेष्ठले जानकारी दिए ।
कार्यदलले प्रतिवेदन अध्यक्षद्वयसमक्ष प्रस्तुत गर्ने र थप छलफलका लागि बैठकमा पेस पनि श्रेष्ठले जानकारी दिए ।
गत असार १० गतेदेखि शुरु भएको स्थायी समिति पटक पटक बस्दै स्थगित हुदै आएको पृष्टभूमिमा विवादले चरम रुप लिएका बेला आज सचिवालयको बैठक बसेको हो । पार्टीमा देखिएको आन्तरिक किचलो मिलाउन अध्यक्षद्वयले गठन गरेको कार्यदलले गृहकार्य गरिरहेका बेला सोमबार सचिवालय बैठक बोलाइएको हो ।
अध्यक्ष एवं प्रधानमन्त्री केपी शर्मा ओली र अर्का अध्यक्ष पुष्पकमल दाहालबीच गत साउन ३० गते भएको छलफलबाट महासचिव विष्णु पौडेलको संयोजकत्वमा ६ सदस्यीय कार्यदल गठन भएको थियो । कार्यदलमा शंकर पोखरेल, जनार्दन शर्मा, पम्फा भुसाल, सुरेन्द्र पाण्डे र भीम रावल सदस्य रहेका छन् ।
