असार २२ काठमाण्डौँ । के लकडाउन खुकुलो भयो भनेर मास्क नलगाई भीड गर्दै हिड्ने गर्नु भएको छ ? त्यसो हो भने अब तत्कालै मास्क लगाएर सामाजिक दुरी कायम गरेर हिड्नु होला अन्यथा प्रहरीले अब तपाईलाई समात्न सक्छ ।
गृह मन्त्रालयले मास्क नलगाई घरबाहिर निस्किने र सामाजिक दूरी कायम नगर्नेलाई तत्काल पक्राउ गर्न प्रहरी र ७७ वटै जिल्ला प्रशासन कार्यालयलाई निर्देशन दिएको छ ।
पटक पटक स्वास्थ्य मन्त्रालयद्धारा अनुरोध गरिए पनि मानिसरु मास्क नलगाई र सामाजिक दुरी कायम नगरी मान्छेहरु हिडिरहेको पाईए पछि सरकारले यस्तो निर्देशन दिएको हो ।
सोमबार दिउँसो प्रशासन र प्रहरीलाई परिपत्र गर्दै मन्त्रालयले स्वास्थ्य मापदण्ड अनुसार सामाजिक दूरी कायम नगर्ने र मास्क बिना बाहिर हिँडडुल गर्नेमाथि संक्रमक रोग नियन्त्रण ऐन अनुसार कारबाही गर्न निर्देशन दिएको गृहका सहप्रवक्ता उमाकान्त अधिकारीले बताए ।
लकडाउनलाई स्वास्थ्य मापदण्ड पालना गर्दै खुकुलो बनाउने नीति अबलम्वन गरिएपनि सर्वसाधारणसहित सरकारी, निजी तथा गैरसरकारी संघसंस्था र कार्यालयले यसको उल्लंघन गरेकोले तत्काल कडाइका साथ पछिल्लो निर्देशन कार्यान्वयन गराउन गृहले निर्देशन दिएको अधिकारीले बताए ।
सरकारले असार १ गतेबाट लागू हुनेगरी लकडाउन खुकुलो बनाएको थियो ।
