काठमाडौं असार २२ । नेपालमा अन्य दिनको तुलनामा आज केही कम कोरोना संक्रमित भेटिएका छन् । स्वास्थ्य मन्त्रालयका प्रवक्ता डा. जागेश्वर गौतमका अनुसार आज देशभर एक सय ८० जना संक्रमित भेटिएका छन् । यो सँगै नेपालमा कोरोना संक्रमितको संख्या १६ हजार नजिक १५ हजार ९ सय ६४ पुगेको छ । हिजो २९२ जनामा कोरोना संक्रमण देखिएको थियो।
तर काठमाण्डौं उपत्यकामा भने संक्रमित बढीरहेका छन् । आज मात्रै काठमाण्डौं उपत्यकामा ५४ जना संक्रमित थपिएका छन् । जस मध्य २४ जना काठमाण्डौ, २० जना ललितपुर र भक्तपुरका १० जना संक्रमित भएको प्रवक्ता गौतमले जनाएका छन् ।
मन्त्रालयका अनुसार अहिलेसम्म क्वारेन्टाइनमा २९ हजार २१५ रहेका छन् भने आइसोलेसनमा ९ हजार ११८ जनाको उपचार भइराखेको छ । पछिल्लो २४ घण्टामा २५ वटा प्रयोगशालामा ४ हजार ७२१ नमुनाको पीसीआर परीक्षण गरिएको छ ।
यस्तै कोरोना जीतेर घर फर्कनेको संख्या पनि बढ्दो छ । पछिल्लो २४ घण्टामा २६४ थप कोरोना जितेर डिस्चार्ज भएका छन्। मन्त्रालयका अनुसार निको हुनेको संख्या ६ हजार ८११ जना पुगेको छ।