काठमाडौँ, २१ असार ।राष्ट्रपतिसँग सामूहिक भेटपछि नेकपा अध्यक्ष पुष्पकमल दाहाल प्रधानमन्त्री केपी ओलीसँग भेट गर्न बालुवाटार पुगेका छन् । अहिले बालुवाटारमा प्रधानमन्त्री ओली र अध्यक्ष दाहालबीच वार्ता चलेको छ ।
राष्ट्रपतिसँगको भेटमा दाहाल लगायतका नेताहरुले राष्ट्रपतिलाई महाअभियोगको हल्ला सत्य नभएको भन्दै विश्वस्त हुन आग्रह गरेको नेकपाका एक नेताले बताए । यो हल्ला बालुवाटारबाटै फैलाइएको भन्दै उनीहरुले राष्ट्रपतिको संस्थालाई आफूहरुले विवादमा नपार्ने बताएका थिए ।
पार्टीभित्रको आन्तरिक विवादमा राष्ट्रपतिलाई तान्नेगरी प्रधानमन्त्रीले अभिव्यक्ति दिएको भन्दै नेताहरुले राष्ट्रपतिलाई प्रयोग नहुन पनि आग्रह गरेका थिए ।
यसअघि बरिष्ठ नेताहरु माधवकुमार नेपाल र झलनाथ खनाल तथा उपाध्यक्ष बामदेव गौतम र प्रवक्ता नारायणकाजी श्रेष्ठसहित दाहाल राष्ट्रपति विद्यादेवी भण्डारीलाई भेट्न पुगेका थिए ।